«Մենք դա անում ենք, որովհետև ունենք Արամ Խաչատրյան». Ալեն Սիմոնյանը՝ ՀՀ օրհներգը փոխելու նախաձեռնության մասին

Օրեր առաջ ԱԺ փոխնախագահ Ալեն Սիմոնյանը սոցցանցում գրառում էր կատարել Արամ Խաչատրյանի օրհներգի վերաբերյալ:

«Այ սա հզոր օրհներգ է, որը համապատասխանում է բոլոր պահանջներին»,- գրել էր նա: Արդյո՞ք սա նշանակում է, որ խորհրդարանական մակարդակով ՀՀ օրհներգի փոփոխության գործընթաց է սկսվելու: Այս թեմայի շուրջ է ԳԱԼԱ-ն զրուցել ԱԺ փոխնախագահ Ալեն Սիմոնյանի հետ:

-Պարո՛ն Սիմոնյան, սոցցանցային Ձեր գրառումն ի՞նչ արձագանք է գտել Ձեր գործընկերների շրջանում:

— Ես նախաձեռնելու եմ քննարկումներ, քննարկելու եմ այդ հարցն իմ թիմի անդամների հետ: Կարծում եմ, որ հանրային լայն քննարկման ժամանակն է, ճիշտ կլինի, որ փոխվի ՀՀ օրհներգը, և որպես դրա երաժշտություն Արամ Խաչատրյանի երաժշտությունը վերցվի:

-Որքանո՞վ եք վստահ հաջողության հասնելու գործում: Տարիներ առաջ նման նախաձեռնություն եղել էր, անգամ մրցույթ էր անցկացվել:

-Հիմա այլ ժամանակներ են, որոշումները կախված չեն մեկ մարդուց: Այսօր ՀՀ իշխանությունը ներկայացնում է ՀՀ քաղաքացին: Լայն քննարկման արդյունքում մենք կարող ենք ունենալ կոնսենսուս այս հարցում: Գիտեմ, որ դժվար է լինելու, ընդդիմացողներ են լինելու, այնուամենայնիվ, միայն այն փաստը, որ սոցցանցային հրապարակումից հետո բազմաթիվ դրական արձագանքներ կան թե՛ մասնագետների, թե՛ հանրության կողմից, 80-90%-ը կողմ է, ասում է, որ հաջողության կարող ենք հասնել:

Արամ Խաչատրյանի երաժշտությունը բոլոր կանոններին համապատասխանում է, ի տարբերություն այսօր գործող օրհներգի: Խոսքն այն մասին է, որ օրհներգի երաժշտությունը պետք է այնպիսին լինի, որ երաժշտությունն աստիճանաբար բարձրանա: Երկրորդը՝ Արամ Խաչատրյանի երաժշտությունը, ի տարբերություն այսօր գործող օրհներգի, ամբողջովին հայկական է, այն իր մեջ նաև շարական է պարունակում: Արամ Խաչատրյանը, լինելով խորը հավատացյալ մարդ, օրհներգի մեջ շարական է տեղադրել՝ ընդգծելու համար դրա հայկականությունը: Մենք առաջին քրիստոնյա ազգն ենք և մենք մեր ակունքներին, սովորույթներին պետք է հավատարիմ մնանք: Տեսեք, մի պարզ օրինակ բերեմ. ունենք Խորենացու, Գրիգոր Լուսավորչի, Մաշտոցի անուններով փողոցներ ու պողոտա, սակայն անվանման մեջ «սուրբ» լինելու հանգամանքը չի ընդգծվում: Իսկ ընդգծելը հայրենասիրության շատ լավ ազդակ կլինի:

Արամ Խաչատրյանինը իդեալական երաժշտություն է: Ընդդիմախոսներն այն հակափաստարկը, թե դա խորհրդային Հայաստանի օրհներգն է, մեզ համար անընդունելի է, որովհետև երաժշտությունն արվեստ է, չի կարող լինել խորհրդային, բուրժուական, թագավորական: Չայկովսկին, Բախը, Մոցարտը, Խաչատրյանը ժամանակից ու քաղաքականությունից դուրս համամարդկային արժեքներ են:

-Եթե որոշվի, որ Արամ Խաչատրյանի երաժշտությունը պետք է օրհներգ լինի, տեքստի համար առանձին մրցո՞ւյթ է անցկացվելու:

-Գիտեմ, որ տեքստի մի քանի տարբերակ կա, քննարկումը նոր է սկսվել: Կարծում եմ՝ պետք է հնարավորինը անել, որպեսզի տեքստն ընդունելի լինի բոլորի համար, ակնհայտ է, որ բոլորը միաձայն դրական կարծիք ունենալ չեն կարող, կլինեն հակառակորդներ՝ քաղաքական հայացքներից ելնելով: Օրինակ՝ ես գիտեմ, որ ժամանակին ՀՅԴ-ն է հակառակվել այդ գաղափարին: Բայց որոշումը պետք է կայացվի ըստ քննարկումների, լիազոր մարմնի միջոցով: Լիազոր մարմինը կարող է լինել կամ ԱԺ-ն, կամ ՀՀ ժողովուրդը՝ հանրաքվեի միջոցով: Այնուամենայնիվ, կարծում եմ, որ այսօր ԱԺ-ն լիազորված է և իրավունք ունի որոշում կայացնելու, որովհետև Սահմանադրության մեջ փոփոխություն կատարելու հնարավորություն ունեցող մարմինն իրավունք ունի որոշում կայացնելու:

— Տեքստերի հեղինակների անունները կնշե՞ք:

-Կա մի տարբերակ, որ անանուն հեղինակի է, մյուսների անունները փոքր-ինչ ուշ կհանրայնացնենք, կլինեն տարբերակներ, քննարկումներ կընթանան: Այս հարցում մենք կարող ենք չշտապել, վերջիվերջո, Արամ Խաչատրյանի երաժշտությունը, ինչպես նաև ՀՀ-ն հավերժ են:

-Մտավախություն չունե՞ք, որ որոշ շրջանակներում Արամ Խաչատրյանին վերադառնալը կարող է Ռուսաստանին ընդօրինակելու, նմանակելու քայլ դիտարկվել: ՌԴ-ն էլ ժամանակին Միխայիլ Գլինկայի երաժշտությունը փոխարինեց Ալեքսանդր Ալեքսանդրովի ԽՍՀՄ օրհներգի երաժշտությամբ՝ նորացնելով տեքստը:

— Ի՞նչ նմանակելու մասին է խոսքը: Արամ Խաչատրյանի երաժշտությունը համամարդկային արժեք է՝ ճանաչված ՅՈՒՆԵՍԿՕ-ի կողմից: Թող ռուսները մեզ նմանակեն, հավատք ունենք, պետություն ունենք, մենք Արամ Խաչատրյան ունենք, իրենք չունեն: Եթե երաժշտությունը լավն է և արտացոլում է ազգին, բարձր է պահում վերջինիս պատիվը, ի՞նչ նմանակելու մասին է խոսքը: Եթե մենք գտնում ենք, որ այդ երաժշտությունը լավն է, միայն նրա համար, որ ինչ-որ մեկը նույն ճանապարհով է գնացել, մենք չպե՞տք է անենք: Մենք դա չենք անում նրա համար, որ Ռուսաստանը դա արել է, մենք անում ենք, որովհետև ունենք Արամ Խաչատրյան:

Զրույցը՝ Անահիտ Ավագյանի

(Visited 3 times, 1 visits today)